L’atención al públicu fadráse al traviés del corréu electrónicu, les redes sociales y el teléfonu
L’ALLA algamó esti determín na tarde del xueves 12, alliniándose coles recomendaciones sanitaries anunciaes pol Gobiernu del Principáu d’Asturies no tocante al ámbitu llaboral y xeneral y que se dirixen a favorecer el distanciamientu de la comunidá y el teletrabayu.
D’alcuerdu coles midíes anunciaes pol gobiernu asturianu, l’ALLA caltendrá’l so funcionamientu gracies a una estratexa que combina’l teletrabayu con un serviciu mínimu nel llar social de la institución.
D’esta miente, asegúrense l’atención al públicu al traviés del corréu electrónicu, les redes sociales y el teléfonu y tamién los llabores organizativos y editoriales.
Uviéu, 13 de marzu de 2020